Sono Ambrogina Conca Varenna (varda ti che sorta de cognòmm che gh'hoo de portamm adrèe) ma mi chiamano tutti Gina, o meglio ancora Ginetta ( a mi el me pias pussée Ginetta de Ambrogina)
Mi pensi che si vialter sii finii chi in del me sito, l'è perché gh'avii voueia del sentì parlà anmò in milanes, ma dal moment che mi voeuri resonà con tutta la gent, parlaroo on poo en milanes e on poo in lingua.
Si perchè varda che mi la lingua italiana la cognossi ben del moment che lavori in on colsenter - va bene, ho capito, in un call-center, el soo anca mi l'ingles - e gh'hoo de troà i paroll giust per convinc i gent a comprà i robb pussée inutil e balzan - devo trovare le parole giuste per convincere le persone a comprare le cose più diverse e stravaganti.
Mi son stada abituada a sentì parlà i me gent, la mia mama e el me papà, duu operari della Centrale del latt sempli e s'cett, meglio dire a resunà - a ragionare - in milanes cont la calma de quei che disen: scoltemm che inscì te capissett indoe te gh'hee sbalià - ascoltami che così capisci in che cosa hai sbagliato.
E allora anch'io, quand vedi in gir dei robb sbaliàa - dei comportamenti che non mi piacciono - immagino di parlare con chi ha sbagliato e cerco di convincerlo trovando, anche in questo caso come nel mio lavoro, i paroll giust, le parole giuste.
Ma gh'è on detali, che l'è quest: quand sari i oeucc per "resunà" me vegnen i paroll in rima, capite, a occhi chiusi mi vengono i pensieri in rima, perchè quand che l'andavi a scoeùla el me piaseven tanto el Pascoli, el Foscolo e anche el Carletto Porta. E alora me ven de scriv in poesia.
El dì che ven, quand me levì su, ciappi el foeuj de carta e metti giò quel che hoo immaginàa de dì - il giorno dopo, mi alzo e metto sul foglio i pensieri in rima della sera prima (t'hee vist che anca mò gh'hoo fàa la rima con prima?)
Presempi: ier sira pensavi alla brutta storia del "corona virus" e alora me vegnùu in ment on possibile scongiur, nel caso che il suddetto virus bussasse alla mia porta:
Stèe a sentì
Torna indrée can d’on virùs
che quest chi l’è non el to uss
torna denter al serpent
de impestà gh’è minga nient
ross o giald o bianch o negher
senza ti tucc stann alegher.
Traduzione:
Torna indietro brutto virus
questa non è la porta giusta per te
rientra nel serpente
non c'è niente da infettare
rossi, gialli, bianchi o neri
se te ne vai sono tutti contenti.
Inténdesemm, mi son minga supertiziosa, soo no vialter - non so voi - ma se po provà tri volta nei dì che se lavòra e duu volta la domenega.
Ciao a tutti e a tutte dalla Ginetta
//////////////// O //////////////// O \\\\\\\\\\\\\\\\ O \\\\\\\\\\\\\\\\
Buongiorno a tutti e a tutte, incoeu l'è sàbet - precisazione per i poco domestici col milanese: "incoeu" non è una parolaccia ma vuol dire oggi e sàbet, con un po' di fantasia, te capisset anca ti che voeur dì "sabato"
Come vedete, son drèe a fà su - sto costruendo - il sito. giorno per giorno. Vardée che mi sont ona geometra, anca se dess foo la precaria nel 'colsenter' per via de quei malnatt che m'hann sarà la ditta indoe lavoravi inscì ben. Imperciocchè, la costruzion d'ona cà 'me d'on sit - di una casa come di un sito - l'è el me mestée e te vedarett come el diventa bell coloràa e pien de figur.
Mi voeuraria provà a demosrà a vialter, come la me par a mi, che el gh'è on proverbi milanes, on moeud de dì, on aforisma, ch'el po adattàss a tutt i situazion de la cronaca de tutt i dì - un proverbio al giorno - ma per cominciare, senza esagerare, mi la me contentaria de trovà on proverbi a la settimanna.
Alora cominciom incoeu sabet vintcinc de genar con quest bel proverbi chì:
A chi mescia l'acqua al vin, fagh bev l'acqua giò 'n del tinli
A chi mescola l'acqua al vino, fa bere l'acqua nel tino
Me par che 'l se compagna ben a la noeuva - la notizia - de quei malnatt - mej, che numm semm garantisti - de quei suppòst malnatt - che faseven el vin cont el zùccher e l'acqua. Ringraziemm el Signor che la frode l'era minga pericolosa per la salut dii gent, domà per la salut del portafoeuj e podemm fa una quai battuda: ma, disi, giacchè vendeven el vin - mej, el suppost vin - minga a mezz franc al liter al mercàa rional, ma el ciamaven Doc o Igt o Bio - mica lo vendevano al mercatino a cinquanta centesimi al litro, ma lo classificavano Doc Igt o Bio - pò vess che ona quai bottelia l'è finida su la tavola d'on "mastersceff" o "sommeliè" e magara lù l'ha dì: ottimo, con retrogusto di tannino. Ciumbia, l'ha sentìi no che al post del retrogusto di tannino gh'era el retrogusto di Ticino?
El proverbi, che el par tajàa su misura per questa situazion chì, suggeriss, depos de la sentenza definitiva, de mett i malnatt cont el còo en del tin - con la testa nel tino - ma minga pien de vin, nanca quel farlocc, ma pien de acqua. Naturalment sarann minga condannàa in quella brutta manera. Numm, però, pòdom pensà che ai temp che l'è stàa inventàa el proverbi, quaivun l'ha finìi i so dì cont i pèe per aria e el còo a bagn.
Per adess l'è tutt. Po vess che se stasira, quand sari i oeucc, me ven in ment ona quai rima a proposit del vin farlocc doman la posti chi in del sit.
Ciao a tutti e a tutte dalla vostra Ginetta
//////////////// O //////////////// O \\\\\\\\\\\\\\\\ O \\\\\\\\\\\\\\\\
Gh’è minga la bisogna
del zuccher per fa el vin
che basta la vergogna
de l’acqua del Ticin
Lor te ne brenten piena
tutta ona damigianna
l’acqua la pròa tal pena
per quella azion malsana
de vess ciamàa Bonarda
che la deventà rossa
inscì vun che la guarda
per tant vardà ch’el possa
capiss minga el manegg
el paga per vin bon
alfin quel che l’è pegg
l’è colpa de nissun.
'Dess ve fòo la spiega:
Non c'è bisogno dello zucchero (e magari delle polverine) per fare il vino. I sofisticatori riempiono una damigiana di acqua del Ticino e mettono l'etichetta "Bonarda". L'acqua del Ticino diventa rossa per la vergogna. Chi la vede, per quanto la osservi, non si accorge che è acqua tanto che è rossa e la paga per vino buono. Ma non è colpa di nessuno perchè l'acqua ... ha fatto tutto da sola!
Adess ve saludi perchè gh'hoo de andàa in struso cont i me amìs - devo andare a zonzo con i miei amici.
Ciao a tutti e a tutte dalla vostra Ginetta
//////////////// O //////////////// O \\\\\\\\\\\\\\\\ O \\\\\\\\\\\\\\\\
Buongiorno a tutti e a tutte, incoeu l'è lunedì vintisètt de genar - 27 gennaio - ona giornada special per do (diconsi due) reson: vuna che l'è el dì de la memoria, che el voeur dì de desmentegass no de quel che i personn, omenn ma anca donn, arriven a fà quand perden la testa per andagh adrée a on firlinfoeu matt - tradotto: non dobbiamo dimenticarci di quello che uomini e donne sono capaci di fare quando perdono la testa per andar dietro a un pifferaio pazzo - e devegnen bestie, e vuna che ier el me vecc amis di gioeugh, el Matteo, l'ha ciappàa on scuffiòtt in Emilia Romagna - il mio vecchio compagno di giochi Matteo ha preso uno scapaccione - anca per merit de i "sarditt".
Vialter disarii: cosa c'entri tu con le sardine! Gh'entri, orca se gh'entri. Ades ve conti de quand me son trovada in piazza del Domm, el primm de dicember, in mezz a tutt i gent che cantaven Bella ciao e anca i paroll del Fabrizio De Andrè. L'è stàa insci bell, m'han dàa on pessin de carton - un pesciolino di cartone - e hoo pricipiàa a cantà anca mi.
Perchè col Matteo gh'avevi fàa un mucc de "resunad" - voeuri dì idealmente minga de personna - quand che vedevi o sentivi i sò strambarii e poeu, el dì depos, mettevi giò i "resunad" a la me manera, in rimm milanes.
On bell dì el me zio Battista l'ha trovà in on canton i me fojett e anca i disegn de le piazza cont i "sarditt" e gh'ha avuu l'idea de famm ona sorpresa.
L'ha fàa stampà on liber.
Del moment che tutt i mè "resunad" principien con: Ohei bell fioeu ... el gh'ha fàa dà el nom OHEI BEL FIOEU...
Se la ve pias la poesia meneghina e anca on poo la satira podii trovà el liber chì:
Adess ve saludi perchè gh'hoo de mett giò ona "resonada" col Matteo - devo scrivere un "ragionamento" col Matteo - che hoo pensàa ier sera dapos dei resultaa di elezion.
Ciao a tutti e a tutte dalla vostra Ginetta
//////////////// O //////////////// O \\\\\\\\\\\\\\\\ O \\\\\\\\\\\\\\\\
Buongiorno a tutti e a tutte, incoeu l'è mercoldì cinc de febrar.
L'è on poo de temp che se sentom no perchè gh'hoo avoo de tribolà indoe lavori per difend el me post de precaria e convins el me padron a minga andàa in Albania per spend quater ghej de men (per convincarlo a non delocalizzare in Albania per risparmiare quattro soldi.
Gh'hoo dì: che la staga attent che in quei post lì gh'è la terra che la trema, menter chi a Milan la trema, ma domà per la Metropolitana (a Milano la terra trema sì, ma solo per la Metrò) e lù el m'ha rispost: "Brava Ginetta, te gh'hèe reson. Mej quater danée de men ma quater ann pussée de viv",
El m'ha dàa anca per premi on bott de aument de paga. Tri centesimi a l'ora. Se lavori des or al dì tutti i dì, senza mai ciappàa nanca on raffredor, a Natal podi fà ona crociera sul Navili de la Darsena fin anca a Boffalora.
Dai, l'è andada ben che la m'ha minga licenziada.
Ma adess, ve fòo legg la "resonada" che v'avevi parlàa 'n de l'ultima ciciarada de lunedì: ona resonada cont el Matteo e cont el Luigino, che anca lù l'è vegnù foeura minga ben daj elezion de l'Emila Romagna, anzi el s'è tiràa foeura tri dì primma e la gh'ha cavàa via anca la cravatta che l'era devegnuda on poo stretta.
Me piasaria savè se quaivun de vialter l'è dacord con mi:
Cari i me fioeu, parlemm on poo de storia:
el 27 de genar de quell’ann chì
‘me semper l’è stàa el “dì de la memoria”
la memoria de quei doo che hinn immattìi
e mettend al primm post disprezz e boria
tutt el mond per des ann l’han fàa soffrì,
inscì de la gent, per la so gloria,
sessanta e passa milion ‘l n’ha fàa morì
pussée del des per cent de tutt quei mort
Testimoni di Geova, zingher mes'ciàa
a giudee, 'mossessuai domà col tort
de vess nassùu col pedigrì sbalià
ma speri che per ti e el to amis Luigino
poed vess el dì d’ona memoria noeuva:
quant hinn inutil incoeu e ier a Berlino
disprezz e boria per vinc gh’avii la proeuva.
l’alter, che ier paria ona scarpa fina
incoeu ‘l s’è ritrovàa ‘me ona sciavatta
e l’è sparìi d’on bott de la vedrinna
senza l’onor e senza la cravatta.
Magara, se sbassìi on ciccin la cresta,
de quei canaja che scriven sòra i port
“chì gh’è on giudee” sicur doman la resta
domà la sensazion d’on brutt ricord.
Mi disi che per incoeu l'è assée (che per oggi è abbastanza) e alora ve saludi
Ciao a tutti e a tutte dalla vostra Ginetta
//////////////// O //////////////// O \\\\\\\\\\\\\\\\ O \\\\\\\\\\\\\\\\
Buongiorno a tutti e a tutte, incoeu l'è sabet vott de febrar.
L'è arivada l'ora de trà foeura on alter bel proverbi milanes che 'l va giust per quaiduna delle situazion de quei temp chi. Gh'hoo pensàa a quest chi:
La cativa lavandêra la troeuva mai la prèja bonna.>
La cattiva lavandaia non trova mai la pietra giusta (su cui lavare)
che l'è on proverbi fàa aposta per i donn milanes de cent o centcinquant'ann fa che faseven el mestée de andà a lavà cont el paltòn (un impasto di cenere, soda e sapone) e resentà i pagn ( a lavare e risciacquare la biancheria) lungo il Naviglio indoe che gh'eren di prej grand e soeuli (delle pietre grandi e lisce) visin a l'acqua.
La lavandera la se metteva giò cont i ginoeucc sul brellin a fianch del fossett e menter che sbatteva i pagn la ciciarava. Adess, per spiegà che cosa l'è el brellin, ve 'l disi cont i paroll del Francesco Cherubini: "Brellin... cassoncino poco dissimile da una picciolissima biga, in cui le lavandaje s'accosciano ginocchioni per lavare i panni alla pietra. E' allogato sul margine di quel fossato ove stanno lavando."
Ancamò, ai bord del Navili, apenna foeura de la Darsena gh'è on cantòn mantegnù come alora ciamàa Vicolo dei lavandai, attenzion, "lavandai" perchè i primm a fà quel mestée lì hinn stàa i omenn.
Le lavandaie sono arrivate dopo. Concludendo - come el diseva el Mike Bongiorno nella reclamé della grappa - me par che el nost proverbi voeur dì che quand vuna l'è minga bona de lavorà, in tutt i post troeuva qualche scusa per lavorà no.
Sta storia la me ricorda le "multinazionali" che pod vess che hinn minga bon de fà nanca i padròn e alora disen che la "produttività" l'è tropp bassa, che ij operari hinn pagàa tropp (anca se ciappen men de quej todesch) e lassen in mudand ij operari nostran per andà a fà morì de famm quei de la Macedonia
Ah, santa pazienza. Ghe voraria che el Signor la mandass giò ona appendice ai tavol de la legge, el comandament numer vundes: in tutt el mond ij operari hinn de pagà tot franch a l'ora. Ciapa su e porta a cà. Magara, anca ij operator di i colsenter!
Mi disi che anca per incoeu l'è assée (che anche per oggi è abbastanza) e alora ve saludi
Ciao a tutti e a tutte dalla vostra Ginetta
//////////////// O //////////////// O \\\\\\\\\\\\\\\\ O \\\\\\\\\\\\\\\\
Buongiorno a tutti e a tutte, incoeu l'è venerdì quatordes de febrar.
L'è el dì dii inamoràa. L'è el dì indoe, on poo come a Natal, tucc se vòren ben per definizion: se vòren ben devera, se vòren ben per finta, se vòren ben per convenienza, se vòren minga tropp ben. Ma tucc gh'han de dì: te voeuri ben!. I mas'cc ariven a cà o al apontamént cont i cicolattin e i fior. Gallòfor. roeus. Garofani, rose. Quaivun che gh'ha minga avoo temp de andà dal fiorista el s'è presentàa cont on fass de articiocch (un mazzo di carciofi) che in di sti temp l'è mej andà su la concretezza e poo l'è el pensier che conta. Peccàa che per tanti donn la festa la dura domà vintiquatr or e el dì depòs la prinzipia anmò la litania di j sospett e de la gelosia.
L'è vera che gh'è on proverbi che el dis:amor e gelosia se fan semper compagnia .>
Amare e gelosia vanno sempre a braccetto
e on alter che el dis:
Cent'ann de moròs, gnanca on dì de spòs >
(cent'anni di fidanzamento, neanche uno di matrimonio)
che insegnen che i problemm de la cobbia hinn semper stàa istess. L'è che adess la gelosia la deventa subit tragedia e i gent hinn minga bon de viv insema, perchè ognidùn el pensa domà per lù o per lee e nissun de i do se preoccupa de l'alter. Vorarià no sbaliamm, ma a mi me par che se ciama egoismo e in quei temp chi l'è la mercanzia che la venn su pussée svelta.Anca per incoeu l'è arrivàa e moment de saludass e alora, amis visin e lontan, ve saludi
//////////////// O //////////////// O \\\\\\\\\\\\\\\\ O \\\\\\\\\\\\\\\\
Buongiorno a tutti e a tutte, incoeu l'è lunedi dersétt de febrar.
L'altra sira l'han fàa vedè la storia trista de Tangentopoli e l'han dìi che l'è cominciada in ona manera buffa propi el dersett de febrar del 1992 chì a Milan. Quand che i Caramba hinn arivàa in del offici del Mario Chiesa, stimato ingegnere che a la Baggina l'era minga vun come ij alter, l'era el President ma se occupava pussée de quand el sariss stàa lu vecc che dii vegett che l'eren già arrivàa visin a la partenza per el paradis,(si occupava più della sua vecchiaia che di quella degli ospiti moribondi del Pio albergo Trivulzio) gh'han trovà in di man on poo de i danée de ona tangent. El Mariolino, anzi El Mariuolino, come l'è stàa ciamàa de l'alter margniff del Bettino, che el gh'aveva in saccoccia on altra bustarella, l'ha pensada giusta: i danée hinn sporch, alora mi i butti in del cess, insci se netten.
Ma l'ha fàa mal i cont, perchè, anca se i danée hinn ciamàa "lo sterco del diavolo" pod vess che non tutta quella "materia" la passa via diretta. I biliett de banca tropp gross, la par, van minga giò ben e - traccheta - i Caramba han trovàa anca el rest de la frittada.Questchì sariss on anniversari de desmentegall, anca se el sport de la "mazzetta" l'è semper de moda, perchè el fa ombria a un alter anniversari. quel del Giordano Bruno, brusàa in del 1600 a Roma. Già, perchè in quei temp là te podevet domà dà resun al Papa, diversament te brusaven. E la faccenda de mazzà ij eretegh l'è minga finida subit ma l'è andada avanti fino al 1800.
Varda ti la coicidenza. Hoo digitàa: "cosa ci ricorda il 17 febbraio" el m'è vegnù foeura on alter anniversari ligàa a la storia dij eretegh: il 17 de febrar del 1848 el Carlo Alberto, re di belle speranze, la gh'ha concedùu la libertà ai Valdesi e poeu ai Ebrej. El gh'ha dàa le Patenti, propi inscì, perchè la gh'era bisogn de le Lettere Patenti per avegh la libertà de cred a la propria religion senza vess perseguità o saràa denter a on ghetto (i Ebrej) o a i sò Vallad (i Valdes).
Se hoo capì ben l'era ona libertà condizionada ma semper mej che nient.
Come el dis el vecc proverbi:
piutost che nient, l'è mej piutost
E a furia de daghela coi "piutost" me par che i Valdes, al dì d'incoeu, hinn quei che hinn stàa i primm insema al Sant'Egidio, a organizzà i "corridor umanitari" per ciamà in sicurezza i vitimm de la tragedia siriana.Scusée se la m'è vegnuda foeura una mezza lezion de storia, ma si vialter pensìi compagn de mi, la storia l'è el fondament del doman.
Care e cari amis, ve saluda la Ginetta
//////////////// O //////////////// O \\\\\\\\\\\\\\\\ O \\\\\\\\\\\\\\\\
Buongiorno a tutti e a tutte, incoeu l'è domenega vintitrìi de febrar.
Alegriaa! Come el diseva el Mike Bongiorno. Ghe semm! Ci siamo!
Voeuri dì che adess gh'emm anca num la nostra bella produzion de"corona virus". 'Dess finalment pòdom anca num dì de vess no el fanalin de côa 'n de l'Europa in tutt i camp.
Incoeu semm al primm post per numer de contagiàa.
Inscì, in quater dì, minga on giughett. Se andemm innanz inscì pod vess che supérom anca la Cina. Orca!
Per respett a la geografia economica del noster paes, la produzion pussée important l'é chì al nord: Lombardia e Veneto, ma la par che l'è interessàa anca el Piemont a ciapass ona part de la produzion.
Chì al nord num semm bei tranquii perchè i Governador hinn pront a tutte le emergenze: mesur drastich. Se l'é necessari, anca on bel decrett de rimpatri del virus seguìi dal "daspo" a vita.
Chì se scherza no!
Mi speri che i me amis che leggen el me sito hinn personn de spirit, che capissen l'importanza de ciappàa la vita col sorriso, che el voeur minga dì de vess distratt, superficial ma nanca de fà la tragedia greca.
Presempi, la par che tucc i milanés han principiàa a ciamàa e 112 per domandàa informazion su 'l contagg. L'é sbaliàa. Quel numer lì l'é domà per ciamàa el socòrs. Solo per chiamare l'ambulanza. Per tutt i alter situazion gh'è on numer special
Anca quand che gh'avii on poo de gnagnera, quando vi sentite un po' indolenziti e con la febbriciattola, ciamée quest numer chì primma de corr a l'ospedal, capito, prima chiamate il numero verde e chedete indicazioni.
Adess spettém anca ona bella impennada de PIL (puttanàd in libertà - scusée la brutta parola libertà) de quei che disen:
che l'è ona question de guerra batteriologica tra el Trump e la Cina per via de la guerra dei dazi
che l'è ona manovra de i produttor de vaccin che spetten domà de vend el vaccin a on prezz de la madonna
che l'è colpa de la Birra Corona
che per mazzà el virus basta bev on poo de asée, de acqua e candeginna e mangià l'aj (inscì se te mazzet minga el virus però te mazzet el marì o la mièe)
Amis che gh'avii anmo on poo de sàa 'n de 'l còo, (qui ci vuole la traduzione: voi che avete ancora un po' di sale nella testa) sarii daccord che, come el dis el vecc proverbi:
Dal cantà se conós l’osèl, dal parlà se misüra ‘l servèl Dal canto si riconosce l’uccello, dal parlare si misura il cervello
Spettémm doman per vedè quant al và giò el "spred" e quant el va su el PIL
Care e cari amis, alegria, ve saluda la Ginetta
//////////////// O //////////////// O \\\\\\\\\\\\\\\\ O \\\\\\\\\\\\\\\\
Buongiorno a tutti e a tutte, incoeu l'è mercoledì vintisés de febrar.
Alegriaa! Doppia alegria! Ghe semm do volt! Ci siamo due volte!
Voeuri dì che adess gh'emm, en sorapù del "corona virus" anca la "sindrome di Seveso" e la "sindrome di Chernobil".
Amis, che gh'avii anmò on poo de sàa 'n de 'l còo, (traduzione per evitare malintesi: voi che avete ancora un po' di sale nella testa) per piasée, 'scoltée la vostra Ginetta, per quel che gh'hoo capìi mi, modesta geometra
Care e cari amis, alegria, ve saluda la Ginetta
//////////////// O //////////////// O \\\\\\\\\\\\\\\\ O \\\\\\\\\\\\\\\\
Buongiorno a tutti e a tutte, incoeu l'è mercoledì quater de marz.
L'è passada via ona altra settimanna e la situazion l'è minga alegra. A mi la me par che de la part de quei che gh'han el compit de resunà, tegnì el coo a post (ragionare, tenere la testa a posto - intendo i giornalisti, gli opinionisti, gli analisti, i sondaggisti, i medici specialisti, i malpancisti, gli scissionisti, i sovranisti, ) inscì de vegnì fœura de pressa de sta brutta storia del corona virus, la gh'è minga la luciditàa giusta.
Gh'hoo la sensazion de vardà ona partita del frœubi (una partita di football, di calcio - insomma) in doe che appenna on giugador de la mè squadra la fà ona giugada, on passagget, tutt i alter des compagn, piutost che andà avanti a giugà, principien subit a commentà, a critegà, se volten de la part de la tribunna e vun el vòsa: "T'he vist che bravo!" e l'alter: "T'he vist che brocch" e anmò on alter: "Gh'emm de cambià l'alenadòr" ma intant che hinn adrèe a vosà i avversarii metten la balla in de la ret: 1-0 e palla al centro. Nel caso non fosse chiaro il mio pensiero 1- 0 l'è in vantagg el virus, e via inscì.
Possibil che semm minga bon de risparmià el fiàa, giugà tutt insema per vinc la partida e fà i comment quand che emm vinciùu el torneo?
La me nonna la diseva semper (inscì ve dò - pensa ti - duu proverbi:
Eh, cara la mia nonnetta che la ghè pù, che semplice buonsenso!
Avìi capìi che el primm proverbi el vœur dì che con le chiacchiere se combina nient (le chiacchiere non fanno farina).
El second (è la regola che tiene in piedi il convento) che quand che la gh'è ona regola de respettà (e bella o brutta l'è important che la gh'è ona regola), tutt la respetten, che se 'n del convent i fràa i vann ognidun per la sò strada,anca lor combinen pocc. Quindi, adess che gh'è l'emergenza, gh'emm de respettà tutti la regola, altrimenti andemm tutti a la malora.
Care e cari amis, poca alegria, ve saluda la Ginetta
//////////////// O //////////////// O \\\\\\\\\\\\\\\\ O \\\\\\\\\\\\\\\\
Buongiorno a tutti e a tutte, incoeu l'è martedì dersétt de marz.
Cari i me amis, scusee, ma gh'hoo el rimors de squas quindes dì de silenzi. L'è che sont andada el ses de marz a trovà el mè cusin Gilberto ma el dì depòs (il giorno dopo) me son levada cont el coo de preia (con la testa pesante come la pietra) e la févera - trentott e mezz - per la marianna! Gh'hoo pensàa: l'è 'rivàa el Corona virus. Denter in del lett sotta quater coért e mangià pan e Tachipirina, sola in d'ona stanza domà per mi.
Beh, el dottor amis del Gilberto el m'ha dì: spetta tri o quater dì primma de spaventass. Mi hoo spetta e el sabet seguént hinn andàa via tusscoss. S'eri squasi guarida. El dottor amis del Gilberto l'è tornàa anmò e el m'ha dì: l'è domà ona brutta influenza, Ginetta. Ohei, l'è stada la primma volta che hoo vosàa in gir per la cà del Gilberto e poeu anca per la fenestra: son contenta, gh'hoo l'influenza, che bell, gh'hoo l'influenza!
La gent la m'avrà ciapada per ona matta ma mi s'eri insci felis d'avegh minga el Coronavirus che hoo zifolàa l'Inno di Mameli per tutt el dì, tant che el Gilberto e la sò miée - bravissime persone, intendiamoci - me gh'han casciada via per la disperazion.
Poeu l'è 'rivada la brutta notizia: per via semper del virus en de 'l mè colsenter 'dess lavoren domà el 50% dei operator, a turno, inscì ciappom el 50% de paga. Mi son stada lì on moment a pensagh ma poeu me son ricordada che la me nonna la diseva semper (inscì ve dò anca el proverbi):
Eh, cara la mia nonnetta che la ghè pù, che semplice filosofia de la vida!
Avìi capìi che el proverbi el vœur dì che "un povero in buona salute è mezzo ricco" Quindi, adess che gh'è l'emergenza epidemia che la risparmia no nanca i giuin, gh'emm de ringrazià el Signor e contentass de la salud.
Adess ciappi l'occasion per fà anmo on appell:
//////////////// O //////////////// O \\\\\\\\\\\\\\\\ O \\\\\\\\\\\\\\\\
Buongiorno a tutti e a tutte, incoeu l'è martedì sétt de avril.
Cari i me amis, scusee, ma gh'hoo el rimors de alter vint dì de silenzi. L'è che quand che sont andada a cà mia contenta de avegh domà l'influenza, el dì depòs (il giorno dopo) me son levada con la intenzion de scriv giò quaicoss nel sito ma el me Picìn (mi ciami inscì el p.c. el computer) l'era come mort. Gh'hoo pensàa: l'è 'rivàa el Corona virus del pc. Sont andada a pè dal Marietto, che gh'ha el negozi "El dottor del computer" visin a cà mia, ma l'era sarà su anca lù, cont on cartel su la serranda: "Per emergenza telefonare al ......" Per fortuna che el Marietto l'è on bravo fioeu. L'è vegnù subit el dì dopo fin a cà mia e son restada senza el Picin fino a ier che me l'ha portàa indrè noeuv come uscito dalla fabbrica, perchè l'era de cambià l'alimentator. "Adess - el m'ha dì - te podet andà avanti per altri des ann, ma attenta ai virus, che quei hinn brutt come il Covid." Grazie al Marietto adess podi anmò cicciarà con vialter.
Quindi adess stèe attent che ve regali on proverbi che l'è propi giust per el temp del Coronavirus:
Avìi capìi - perché ormai siete quasi milanesofoni - che el voeur dì che la lengua (la lingua) , anche se gh'ha minga denter l'osso che rende robuste, capaci di colpire, altre parti del corpo, la riess a rompere la schiena, cioè riesce a far male.
Lassi a vialter decid chi l'è che in questa buriana mondiale, la gh'ha la lengua che taja che l'è bona domà de dì che ogni cosa che la fà el Govern l'è minga assèe, l'è on elemosina e fudess per lù
o per lée, dariss anca l'indulgenza plenaria.
//////////////// O //////////////// O \\\\\\\\\\\\\\\\ O \\\\\\\\\\\\\\\\
Buongiorno a tutti e a tutte, incoeu l'è domenega dòdes de avril e l'è anca Pasqua.
Cari i me amis, la se dis che la Pasqua te la passet insemma a quei che te voret ti ma el Corona virus l'ha decidùu lu per noialter che, quest ann chì, se resta a cà anca a Pasquetta.
E alora fée minga i gneucch (i craponi) che respetten no la consegna e se cascen 'n de l'auto cont i fioeu, la miée, la sogera e la grella in sul tecc (la graticola sul portapacchi) e quand che vegnen fermàa dai Pollée a i post de blocco tiren foeura l'aria de imbesüì ( l'aria da tonto) e disen: "Numm semm volontari, 'ndemm a dà de mangià ai barbon" (noi siamo volontari e andiamo a dar da mangiare ai clochard). Tombola! I barbon, in on alter sens però, sii vialter che sii minga bon de fà on piccol sacrifizi e ciappée per el nas la Polizia.
Ma mi son sicura che vialter, i me amis, sii tucc brava gent che respetta la regola: io resto a casa".
Adess, dato che l se dis che "chi fa da sé fa per tre" mi che fo de mangià de per mi, vo a mett sù i ravioeù per tri.
Gh'ho minga de desmentegamm de rispond agli auguri del Bruno, de la Martina e de l'Ernesto. Quand che gh'avii quaicoss de scriv. scrivii senza problemi chi sott'a la pagina.
E alora, cont on forte abbraccio virtuale, ve saluda la Ginetta cont on monton de auguri de bona Pasqua
//////////////// O //////////////// O \\\\\\\\\\\\\\\\ O \\\\\\\\\\\\\\\\
Buongiorno a tutti e a tutte, incoeu l'è gioedì sédes de avril.
Cari i me amis, mi son sicura che vialter stìi lì tutti in ansia de savé de mi quaicoss sul Coronavirus perchè l'é on argoment che se ne parla pocch a la radio, la television, i media, i giornal. L'è vera?
Beh, lassem perd l'ironia e parlom on poo del problemma pussée gross (a part quel de i poeri vegett che hinn mort senza el confort de nissun): el problemma de la differenza de condizion economica depòs de la cosidetta "ripartenza".
A mi me pias de pensà la società come una turba de gent che caminen tucc insemma in ona grande strada: quaivun el va in Rolls-Royce, hinn pocch, tanti alter caminen a pè, magara cont ona scarpa sola. Quand che gh'è el sù che brilla, tucc, bene o male, caminen ma quand che la ven ona bufera quei de la Rolls-Royce tiren su el veder e poden tirà drizz (che gh'hann domà ona sgarbellada -un graffio- su la carrozzeria) ma quei che perden anca l'unica scarpa, hinn tanti, poden no caminà e gh'hann domà de fermass.
Passata la bufera 'l ariva on carrett cont ona scorta de scarp. Miracol! A chi l'è che darissov vialter el primm para de scarp inscì che la turba la pò rialzass ???? Bravi. Risposta giusta
Certo. L'esempi che gh'ho fàa l'è simpli (come mi che sont ona povera geometra) e la realtà l'è pussée complicada. Ma l'esigenza prmaria, ‘dess l'è de capì che la turba la camina mej se tucc gh'hann do scarp e quei de la Rolls-Royce se contenten del Mercedes che l'è semper on bel viv.
Atenzion a quei che disen: tranquilli, tutto tornerà come prima. Noooo! Sperem de no. Altrimenti la pandemia l'è servida a nient!
Quindi, per minga perd l’usanza del proverbi, quest chì l'è propi giust per el temp de la riapertura dopo il Coronavirus:
Avìi capìi - cari i miei quasi milanesòfoni - che el voeur dì che i soldi vanno dove ci sono soldi .
In di i temp normal, l'è propi inscì. Adess che gh'emm de costruì (sperem) come tucc disen, ona società noeuva, gh'emm de coreg el proverbi perchè i danée gh'hann de andà 'ndoe gh'è bisogn e minga 'ndoe che ghe n'è già tropp.
//////////////// O //////////////// O \\\\\\\\\\\\\\\\ O \\\\\\\\\\\\\\\\
Ohei, bell fiœu, anca in temp de pandemia
t’hee perdùu minga el vizi de sbroncà;
passàa tri dì de finta cortesia
t’hee dì al Govern che l’era adrèe a sbalià
quand, per fa no morì l’economia,
quater miliard, i primm, l’ha restelàa
te l’hee incolpàa de gran pitoccaria
che almen el doppi l’eren de stanzià
quand che ‘l Govern, vista la brutta sorta,
de quater l’è rivàa fino a cinquanta,
squas che dervissen no la cassaforta,
t’he dì che cent pò vess che hinn minga assée.
Ma el tò pollèe , ‘l gh’ha ona gainna santa
che olter d’i oeuv, deponn anca i danée?
Del moment che la Marisa, che saludi, la m'ha domandàa 'n doe trovà e me liber OHEI BEL FIOEU... adess che l'è sarada in cà e gh'ha el temp de legg, ve disi che podii trovà el liber chì:
Ohei, bell fiœu... e-bookAdess ve saludi chè gh'hoo de scriv on'altra "resonada" col Matteo - devo scrivere un "ragionamento" col Matteo - che hoo pensàa i'alter dì dapos dei voto europeo su i Coronabond.
Scrivìì, me raccomandi, che mi ve rispondi. Ciao a tutti e a tutte dalla vostra Ginetta//////////////// O //////////////// O \\\\\\\\\\\\\\\\ O \\\\\\\\\\\\\\\\
Ohei, bell fiœu, qualment de quand s’erom bagai
te pias semper giugà al bastiancontrari;
ma inscambi de mi, quèst chì l’è el guaj
te giughet col Govern e el so calvari.
Quand l’ha anònziàa: ‘dess gh’emm de dagh on taj
a sante messe e riti funerari
t’hee fàa l’ofés: l’è on sacrileg, sia mai,
per s’ceppà el virus ‘l bastarà el Rosari
in Europa t’hee fàa votà la Lega
contra de quel che t’hee invocàa in Italia
per el prinzipi del “chi se ne frega”
Ma quand giugavom e de ti s’erom stùff
mi o quai alter te casciava via:
i tò elettor soporten i tò bluff?
Adess ve saludi chè gh'hoo de legg el decret noeuv del Govern per capì quand l'è che podi andà a trovà col monopattino el me zio Battista.
Scrivìì, me raccomandi, che mi ve rispondi. Ciao a tutti e a tutte dalla vostra Ginetta//////////////// O //////////////// O \\\\\\\\\\\\\\\\ O \\\\\\\\\\\\\\\\
Buongiorno a tutti e a tutte, incoeu l'è martedì cinc de magg.
Cari i me amis, dato che nel noster paes se parla semper cont i paroll del calcio, alora podem dì che 'n de la partida contro el Coronavirus semm arivàa a la fin del primm temp. Ma attenzion, a mi me pias de pensà che adess gh'è minga subit el second temp ma, come nel calcio, el gh'è l'intervall. 'N del primm temp el virus l'ha dà foeura a tucc on monton de pesciad.
L'intervall, per mi, l'è quel che dura quindes dì - quindici giorni - e quand che i giugador, che semm num, tornen a giugà 'l se vedarà se i pesciad l'hann fàa mal o se el massagiador l'ha fàa el massagg giust e l'allenador l'ha pensàa la disposizion giusta.
Alora se pò giugà el second temp, ma semper cont i mascarinn e la distanza canonica del meter e mez.
Certo. L'esempi che gh'ho fàa l'è, come semper, on poo bislacch (come mi che sont ona povera geometra) ma 'l serv per parlà di una tragedia cont on poo de leggerezza.
L'esigenza primaria, ‘dess, l'è de capì che l'è minga el moment de fà el bargniff - il furbacchione - cont la scùsa de andà dal "congiunto" 'ndà a strusa de chì e de là - andare a zonzo di qua e di la - che inscì femm on despett a numm, minga al Minister Tizio o Caio.
Me raccomandi de desmentegass minga la mascarinna che l'è important quand che semm denter al tram, al bus, alla metro.
Per minga perd l’usanza del proverbi, 'dess ve fòo on scherzett. Quest chì el pariss propi giust per la cura de i mascarinn:
Avìi capìi - cari i miei quasi milanesòfoni - una lavata, un’asciugata, non sembra neanche usata.
Nooo! Stavolta el proverbi el va minga ben. Se l'è possibil, la mascarinna l'è de cambià do volt al dì, quindi, fasii minga i stemègna - gli avaracci - e tegnii semper la mascarinna de ricambi.
//////////////// O //////////////// O \\\\\\\\\\\\\\\\ O \\\\\\\\\\\\\\\\
Buongiorno a tutti e a tutte, incoeu l'è lunedì desdott de magg.
Cari i me amis, in de la partida contro el Coronavirus semm arivàa al prinzipi del second temp. 'Dess podem vedè se i pesciad l'hann fàa mal, se el massagiador l'ha fàa el massagg giust e l'allenador (el "coach" in Italia el se ciama semper Conte!) l'ha pensàa la disposizion giusta.
Adess se pò giugà el second temp, ma semper cont i mascarinn e la distanza canonica del meter e mez.
Adess l'è possibil de andà de chì e de là ma, se presempi, gh'avii de andà come mi a trovà ona zietta a Trecàa (a Trecate, che l'è in Piemont, ma giust chì voltàa el canton - girato l'angolo) gh'avii de spettà el 3 del mes che 'l ven e gh'avii de fermav su la sponda del Ticin, come il Giulio Cesare sul Rubicone. Pazienza
Per mantegnì l’usanza del proverbi, 'dess ve dòo quel che 'l pariss giust per la circostanza de quela che ciamen "la ripresa":
L'è ciar el significàa letteral- cari i miei quasi milanesòfoni - È meglio un uccello in mano che cento che volano, ma a numm interessa el significàa metaforic.
Quest l'è el moment de contentass de pocc ma sicur ( un uccello catturato e quindi in mano) putost che insognass subit l'impossibil (sognare di prendere i cento uccelli impossibili perchè volano)
Inscì respondi anca a la Matilde che la fa la perucchera e la dis che gh'ha paura de vess minga bona de tornà ai temp de prima de la pandemia. Cara Matilde, scolta el proverbi, contentess de quel che l'ven. Sicur el Covid l'ha minga fermàa la crescita dei cavei dii donn e quindi ... fiducia.
Care e cari amis, forza che la partida la finiss al novantesimo, ma 'dess me par che semm vun a zero (per numm) e balla al center. Ve saluda la Ginetta
//////////////// O //////////////// O \\\\\\\\\\\\\\\\ O \\\\\\\\\\\\\\\\
Buongiorno a tutti e a tutte, incoeu l'è gioedì quatter de giugn.
Cari i me amis, se la ve pias la metafora de la partida contro el Coronavirus, alora disemm che semm arivàa en del second temp e il virus el par de 'vegh i gamb on pòo en pappina. Ma l'è minga el moment de sbassà la difesa perché gh'è el ris'c de trà via el vantagg e ciappà doo gol in cinc minut. La gh'ha reson el Sindec quand el se incazza (scusèe la parola tecnica) quand che 'l ved che la movida la deventa la strusciada e quand el ved che la mascarinna la tegnen a l'altezza del gòmbet perché gh'han pagura che tra i effet secondari del virus gh'è anca quel de ciappà el "gòmbet del tennista" quand che tornen a giugà al tennis.
Adess l'è possibil anca de andà, come hoo fàa mi, a trovà la zietta a Trecàa, de là del Ticin, ma attenzion a vess minga ciappà da la pressa, còrr no e mantegnì la distanza de sicurezza anca cont la macchina denanz.
'Dess che l'Europa la gh'ha dervida la borsa, la prinzipia la corsa a trovà a quel che l'è mej de dagh i danée: vun el dis a l'industria, vun a la scoeula, vun a la sanità, vun al turism, vun ai infrastruttur, vun ai disgraziàa, vun al teater e via cantando.
Per respettà l’usanza del proverbi, gh'è on proverbi giust per questa babilonia che el dis inscì:
L'è ciar el significàa, cari i miei quasi milanesòfoni: tutti pensano d’essere nel giusto, ma quand che vun la dis ona robba e on alter el dis el contrari gh'è de speràa che hinn bon de fà minga i fioeu e de capì che ognidùn la gh'ha la responsabilità de fà quaj sacrifizzi propi perchè la bona ventura di i alter l'è anca la soa.
Inscì hoo respondù anca al Giorgio che la so miée l'aspetta on fioeu e lor gh'aveven l'idea de ciamall Matteo, ma 'dess che l'han vist quei birbi del Renzi e del Salvini domanden a mi el nom giust: ciamel Savio, inscì el pò dì quel ch 'l voeur ma tucc gh'han de ricognoss che le semper sagg.
Care e cari amis, forza che la partida la par squas finida.
Ve saluda la Ginetta
//////////////// O //////////////// O \\\\\\\\\\\\\\\\ O \\\\\\\\\\\\\\\\
//////////////// O //////////////// O \\\\\\\\\\\\\\\\ O \\\\\\\\\\\\\\\\